БНСУ-ын “ЖИ ЭЙ ТИ СИ” ХХК-тай хамтын ажиллагааны санамж бичиг байгуулав

ШУА-ийн Ботаникийн цэцэрлэгт хүрээлэн Бүгд Найрамдах Солонгос Улсын “Жи Эй Ти Си” ХХК-тай хамтын ажиллагааны санамж бичиг байгууллаа.

Санамж бичиг байгуулах уулзалтын хүрээнд ШУА-ийн Ботаникийн цэцэрлэгт хүрээлэнгийн захирал, доктор (Sc.D.), профессор И.Түвшинтогтох, “Жи Эй Ти Си” ХХК-ийн захирал Лий Хэ Шиг болон холбогдох төлөөлөгчид уулзалт зохион байгуулж, цаашдын хамтын ажиллагааны талаар санал солилцов.

Талууд дараах дөрвөн үндсэн чиглэлээр хамтран ажиллахаар харилцан тохиролцлоо. Үүнд:

• Гадаад, дотоодын гоёл чимэглэлийн болон ашигт ургамлыг тарималжуулах, үржүүлэх, хамтарсан брэнд бий болгох;
• Залуу боловсон хүчин бэлтгэх, технологийн сургалт зохион байгуулах, мэргэжил дээшлүүлэх чиглэлээр хамтран ажиллах;
• Ижил төстэй уур амьсгалтай орнуудаас ашигт болон эмийн ургамлыг тарималжуулах туршлага судлах, үржүүлгийн эх ургамал сонгон авах, дэвшилтэт технологи нэвтрүүлэх;
• Гадаадын хөрөнгө оруулалт татах боломж, хамтын төслийн хүрээнд хэрэгжүүлэх арга замын талаар санал солилцох.

Энэхүү хамтын ажиллагаа нь ургамал судлал, тарималжилт, инновац, боловсон хүчний чадавхыг нэмэгдүүлэхэд чухал ач холбогдолтой бөгөөд цаашид бодит үр дүн бүхий хамтарсан төсөл, хөтөлбөрүүдийг хэрэгжүүлэх суурь болно гэж талууд үзэж байна.